கலைமானும் கரடியும் • காலம் உன் கையில் • ஞாயிறு பள்ளி குட்டி கதைகள் | Jesus Sam
Jesus Sam8/10/2022 12:27:00 PM
0
-ஓர் குட்டிக் கதை-
அன்பு நண்பா்கள் அனைவருக்கும்,
அன்புடன் இனிய காலை வணக்கம் !! இந்த வாரம் உங்களுக்கு அழகான வாரமாய் அமைவதாக!!!
சிந்திக்க வைக்கும் குட்டிக்கதையுடன் உங்களை சந்திப்பதில் மகிழ்ச்சியடைகிறேன்.!!!
*கலைமானும் கரடியும்*
🦌🦌🦌🦌🦌🦌🦌🦌🦌
கலைமான் ஒன்று தன் இரண்டு குட்டிகளுடன் அடர்ந்த காட்டுக்குள் இறை தேடி அலைந்து கொண்டிருந்தது. மாலை நேரத்த்தில் இருப்பிடம் திரும்பும் வேளை வந்ததும், குட்டிகளை அழைத்துக்கொண்டு புறப்பட்டது.
அப்போது கலைமான் குட்டிகளில் ஒன்று காட்டுக்குள் வழி தவறி விட்டது.அந்தக் காட்டுக்குள் சிறிது தூரம் தன் தாயை தேடியது. ஆனால் தாயையும், உடன் பிறந்த மற்றொரு குட்டியையும், அதனால் கண்டுபிடிக்க முடியவில்லை.
பின்னர் அது காட்டின் ஒரு ஓரமாக நின்று கண்களில் கண்ணீர் பொங்க அழுது கொண்டிருந்தது. அந்த நேரத்தில் அந்த வழியாக கரடிக் குட்டி ஒன்று அங்கு வந்தது. அது கலைமான் குட்டியிடம் எதற்காக அழுகிறாய், என்று கேட்டது .
கலைமான் குட்டியும் தன் சோகக் கதையைக் கூறியது. பரிதாபம் கொண்ட கரடிக்குட்டி, கலைமான் குட்டியை தன்னுடன் தன் இருப்பிடத்திற்கே அழைத்துச் சென்றது.
இரண்டும் நண்பர்களாக இருந்து தங்களின் சிறு வயது காலத்தை கரடிக்குட்டியும், கலைமான் குட்டியும் சந்தோஷமாக கழித்து வந்தன.
கலைமான் வளர வளர அதற்கு அழகிய கொம்பு முளைத்தது . அதன் காரணமாக அது பார்ப்பதற்கு மிகவும் அழகாக தோன்றியது. கலைமானைப் பார்த்த மற்ற விலங்குகள் அதன் அழகை பாராட்டிச் சென்றன. இதனால் கலைமானுக்கு கர்வம் உண்டானது.
அது மற்ற எந்த விலங்குகளையும் மதிக்காமல், ஏளனமாகப் பார்க்கத் தொடங்கியது. இன்று வரை தனக்கு அடைக்கலம் கொடுத்து , தன்னுடன் உயிருக்கு உயிராக பழகி வந்த கரடியிடமும் தன் அழகின் கர்வத்தைக் காட்ட ஆரம்பித்தது .
கரடியே! நீ என்னைப்போல் அழகாக இல்லை. உன் முகத்தைப் பார்க்கவே அசிங்கமாக இருக்கிறது. ஆனால் என்னைப் பார், இயற்கையிலேயே அழகான எனக்கு , இப்போது வளர்ந்துள்ள கொம்புகள் மேலும் அழகு சேர்க்கின்றன. இப்போது உன்னை என் நண்பன் என்று சொல்லிக்கொள்ளவே எனக்கு வெட்கமாக இருக்கிறது . எனக்கு நண்பனாக இருக்க, என்னைப் போல் அழகு படைத்தவறே தகுதியானவர்கள். உனக்கு அந்தத் தகுதி கொஞ்சமும் இல்லை, என்றது கலைமான்.
இதைக்கேட்ட கரடிக்கு முதலில் அதிர்ச்சியாகத்தான் இருந்தது. இருந்தாலும் அதனை வெளியேக் காட்டிக் கொள்ளாமால் 'கலைமானே! உனக்கு உன் கொம்புகள் மிகுந்த அழகுதான். அதை நானும் ஒப்புக்கொள்கிறேன் . அது மட்டுமல்லாது, என் நண்பன் மிகவும் அழகானவன் என்பதும் எனக்கும் தானே பெருமை ! என்றது பெருந்தன்மையுடன்.
ஆனால், உன்னை என் நண்பன் என்று சொல்லிக்கொள்வது எனக்கு அசிங்கமாக இருக்கிறது . நான் தனியாக வாழ முடிவு செய்துவிட்டேன், என்று கூறியபடி கலைமான் அங்கிருந்து புறப்பட்டு போய்விட்டது.
இது நாள் வரை தன்னோடு ஒருமையாக வாழ்ந்த மான், பிரிந்து போவதைக் கண்டு வேதனையில் துடித்தது கரடி. இருப்பினும் மனதை தேற்றிக்கொண்டது.
ஒரு நாள் கலைமான், இறை தேடுவதற்காக வெளியில் சென்றது . அப்போது மரம் ஒன்றில் இருந்த சிறுத்தை , கலைமானை வேட்டையாட துரத்தியது.
சிறுத்தைக்கு பயந்து தலைதெரிக்க ஓடிய கலைமானின் தலை ஒரு மரத்தின் கிளைகளுக்கு இடையில் வசமாக மாட்டிக்கொண்டது . எவ்வளவு முயன்றும் அதன் தலை வெளியே வரவில்லை தன் முழு பலத்தினை கொண்டு கலைமான் தலையை வெளியே எடுக்க முயன்றது . இறுதியில் அதன் கொம்புகள் முறிந்து தலை வெளியே வந்தது.
கொம்புகள் ஒடிந்து போனதால் கலைமான் பார்ப்பதற்கே அசிங்கமாக தோற்றம் அளித்தது. இதைப் பார்த்த மற்ற விலங்குகள் கேலிபேசி சிரித்தன.
கலைமான் அழகிழந்து பழைய படி கரடியிடமே சென்றது . கரடியோ , கலைமானுக்கு நடந்ததைக் கேட்டு வருந்தியது. மானே ! அழகு என்பது எப்போதும் நம்முடன் இருக்கப்போகிற சொத்தில்லை. வயதாக வயதாக அது நம்மை விட்டு விலகுவது உறுதி. உனக்கு கொஞ்சம் விரைவாக போய்விட்டது. இதற்காக வருந்தாதே என்று கலைமானை தேற்றியது கரடி. கரடியின் பெருந்தன்மையைக் கண்டு வெட்கத்தில் தலை குனிந்த கலைமான், அதனிடம் மன்னிப்பு கேட்டது. இருவரும் பழையபடி நண்பர்களாக வாழத்தொடங்கினர்.
*என் அன்பு வாசகர்களே,*
அழகு வெளிப்புறத்தில் காணப்படுவது மாத்திரமல்ல அது ஒவ்வொரு மனிதனின் உட்புறத்திலும் காணப்பட வேண்டும். வெளிப்புற அழகு வயதாக வயதாக குறைந்துக்கொண்டே வரும் ஆனால் உட்புறத்திலிருந்து புறப்படுகிற அழகு நாட்கள் செல்ல செல்ல கூடிக்கொண்டே போகும்.
"அகத்தின் அழகு முகத்தில் தெரியும்" என்பது பழமொழி. இன்று வெளித்தோற்றத்தில் மிகவும் அழகாக தெரிய வேண்டும் என்பதற்காக என்னவெல்லாம் செய்ய வேண்டுமோ அதை எல்லாவற்றையும் ஒன்று விடாமல் செய்கின்றனர். இந்த அழகை வேதம் இவ்வாறு கூறுகிறது,
எத்தனை தான் உலக அழகிகள், ஆணழகன்கள் வந்தாலும் நம் இயேசுவின் அழகிற்கு ஈடாக முடியாது. அவர் வெளிப்புறம் மட்டுமல்ல உட்புறத்திலும் மிகுந்த அழகுள்ளவர். சரி உட்புற அழகு என்றால் என்னவென்று பார்ப்போம்.
நமக்கு தெரிந்த அல்லது தெரியாத ஒரு நபர் நம் கண் முன்னே கஷ்டப்படும் போது அவர்களை கண்டும் காணாதவர்களை போல அந்த இடத்தை விட்டு விலகி செல்வது. இன்றைய காலகட்டத்தில் தாங்கள் உட்புறம் அழகாக இருக்கிறது என்று மற்றவர்களுக்கு காண்பிக்க, அநேகருடைய கண்களுக்கு முன்பாக பலருக்கு உதவி செய்கிறார்கள். அதை வஞ்சனையோடு படம்பிடித்து சமூக வலைத்தளங்களில் பதிவேற்றி தங்கள் பெயரை பிரஸ்தாபப்படுத்துகிறார்கள். இதனால் எந்த பிரயோஜனமும் இல்லை என்பது தான் உண்மை.
To Get Daily Story and prayer requests in What's App Contact +917904957814
நம் வெளிப்புறம் அழகாக வேண்டும் என்றால் முதலாவது நம் உட்புறம் தூய்மையாக இருக்க வேண்டும் என்பதை இயேசுவும் தம் போதனையில் போதித்திருக்கிறார்.
நம் உட்புறம் சுத்தமாகும் போது நம் வெளிப்புறமும் தானாகவே அழகாக மாறும். அழகை பற்றி சொல்ல வேண்டுமானால் இன்னும் அநேக காரியங்கள் உண்டு அவற்றை எழுதினால் குட்டிக்கதை மிகப்பெரிய கதையாகி விடும் எனவே இதோடு முடிக்கிறேன்.
எனவே நம் உட்புறத்தை தூய்மையாக்குவோம் நம் வெளிப்புறத்தை நாம் எதிர்ப்பார்ப்பை விட மென்மேலும் தேவன் அழகாக்குவார்.
--ஓர் குட்டிக் கதை -
அன்பு நண்பா்கள் அனைவருக்கும்,
அன்புடன் இனிய காலை வணக்கம் !! இந்தநாள் உங்களுக்கு நல்ல நாளாய் அமைவதாக!!!
சிந்திக்க வைக்கும் குட்டிக்கதையுடன் உங்களை சந்திப்பதில் மகிழ்ச்சியடைகிறேன்.!!!
*காலம் உன் கையில்*
#############
காலம் மணி ஒன்பது. சூரியக் கதிர்கள் முருகன் வீட்டையும் எட்டிப்பார்த்தது. ஆனால், இன்னும் முருகன் எழுந்திருக்கவேயில்லை.
“முருகா, எழுந்திரு, எழுந்திரு’ என அவன் அப்பா சத்தம் போட்டபடியே வந்தார். ஒரு முறை தலையைத் தூக்கிப் பார்த்த முருகன் “கொஞ்சம் இருங்கப்பா’ என்று சொல்லி விட்டு மீண்டும் தூங்க ஆரம்பித்து விட்டான்.
“ஏங்க, குழந்தைக்கு இப்பதான் பரீட்சை முடிஞ்சிருக்கு… கொஞ்சம் நேரம் தூங்கட்டுமே.. விடுங்க…’ என்று அவன் அம்மா முருகனுக்காக பரிந்து பேசினார். அதைக் கேட்டதும் முருகன் இன்னும் இழுத்துப் போர்த்துக் கொண்டு தூங்க ஆரம்பித்து விட்டான்.
அவனுக்கு பரிதியும், மதியும் ஒன்றுதான். இரவு,பகல் பாராமல் எப்போதும் சும்மா கிடப்பதே சுகம் என்று விடுமுறை நாட்களில் தூங்க ஆரம்பித்து விடுவான்.
“நீ இப்படி அவனுக்காகப் பரிந்து பேசினால் எப்படி அவன் முன்னேறுவான்? இப்படித் தூங்கித் தூங்கியே அவன் பொழுதைக் கழிக்கிறான். ஒண்ணு தூக்கம், இல்லைனா டி.வி.’ என்று அரற்றியபடியே வேலைக்குப் புறப்பட்டார் முருகனின் அப்பா.
அன்று மாலை முருகனின் தாத்தா ஊரிலிருந்து வந்தார். தன் பேரன் எப்போதும் போல தூங்கியே நேரத்தை வீணடிப்பது அவருக்குப் பிடிக்கவில்லை. அற்புதமான காலை, மாலை நேரத்தை அவன் படுக்கையிலேயே கழிப்பதை அவர் சுத்தமாக வெறுத்தார்.
அவர் தனது மகளிடம் “என்னமா உன் பையன் இன்னும் தூங்கிகிட்டேயிருக்கான், எழுப்பும்மா, படிக்கச் சொல்லு அல்லது உடற்பயிற்சி ஏதேனும் செய்யச் சொல்லு’ என்றார். “இல்லைப்பா… அவனுக்கு இப்பதான் பரீட்சை முடிஞ்சிருக்கு. கஷ்டப்பட்டு படிச்சிட்டுத் தூங்கிட்டிருக்கான்’ என்றார்.
“நீ செய்யறது கொஞ்சம் கூட நல்லாயில்லைம்மா. நேரம் என்பது நமக்குக் கிடைத்திருக்கிற அற்புதமான செல்வம். அது அள்ள அள்ளக் குறையாத பொக்கிஷம். அதனை பயன்படுத்தாமல் விட்டால் நமக்கு நாமே அழிவைத் தேடிக்கிறோம்னு அர்த்தம். நேரம் போதவில்லை என்று பலரும் வேதனைப்படறாங்க. இளமையில் நேரத்தைப் பயன்படுத்தாமல் வீணே தூங்கிக் கழிப்பது குதிரை கீழேயும் தள்ளி குழி பறிப்பதற்குச் சமம்’ என்றார் தாத்தா.
அப்போது, உள்ளே வந்த முருகனின் அப்பா, “நல்லா சொன்னீங்க மாமா, முருகன் நேரத்தை ஒரு பொருட்டாகவே மதிப்பது இல்லை. தேர்வுக்குக் கண் விழித்துப் படித்தான் என்பது உண்மைதான். அதுக்காக அதையே சாக்காக வச்சிக்கிட்டு இருக்கிற நேரத்தை வீணடிக்கலாமா? பக்கத்து வீட்டு செந்தில், காலையில் யோகா வகுப்பு, பள்ளியில் படிப்பு, மாலையில் டான்ஸ் கிளாஸ், பின்னர் டென்னிஸ் பயிற்சி என்று நேரத்தைத் திட்டமிட்டு பயன்படுத்தறான். இதெல்லாம் அவனாகவே வலியச் சென்று சேர்ந்து கொண்டவை.
அதனாலே, அவன் நேரத்தை வீணடிப்பதே இல்லை. சொல்லப் போனால் விரும்பி மாட்டிக் கொண்டவை. அது அவனுக்குத் தளைகள் அல்ல. பின்னால் அவனுக்கு கழுத்தில் விழப் போகிற வெற்றி மாலைகள். அதனால், அவன் பள்ளியில் முதல் மாணவனாக மட்டுமல்லாமல், இதர கலைகளிலும் தேர்ச்சி பெற்று மற்ற மாணவர்களுக்கு முன்னுதாரணமாக எப்போதும் புத்துணர்ச்சியுடன் இருக்கான்’ என்றார்.
அப்போது தாத்தா, “ஆமாங்க… விடுமுறை என்பது தூங்கியோ, வீணாக அரட்டை அடித்து பொழுது போக்கவோ அல்ல. ஓய்வெடுத்து இன்னும் நம் திறமையை வளர்க்க வேண்டும் என்பதற்காகத்தான். லேட்டா எழுந்து, லேட்டா சாப்பிட்டு, வீணே பேசி அரட்டை அடித்து, வீணே போகும் நேரம் எல்லாம் விழலுக்கு இறைத்த நீர் போல் அமையும். சீக்கிரம் எழுந்து, சுறுசுறுப்பாக இருக்கும் பழக்கத்தை குழந்தைகளுக்கு நாம்தான் சொல்லித் தரணும். நல்ல குணம், நல்ல எண்ணமாகும். நல்ல எண்ணங்கள் நல்ல செயல்களுக்கு வித்து. விடுமுறையில் நல்ல புத்தகங்களைப் படிப்பது அறிவு வளர்ச்சிக்கு உதவும்.
நல்ல பழக்கம், நல்ல வழக்கமாக மாறும், நல்ல வழக்கம் நல்ல ஒழுக்கத்தை வளர்க்கும். காலையில் உடற்பயிற்சி செய்தால் நோய்கள் நம்மை அண்டாது. அதனால், காலையில் சீக்கிரம் எழ வேண்டியிருக்கும். செய்வதற்கு ஒண்ணும் இல்லையே என்ற எண்ணமும் எழாது. பொழுதை என்ன செய்து போக்கலாம் என்ற குற்ற உணர்வும் வராது. சும்மா இருக்கிறோமே என்ற மன வருத்தமும் ஏற்படாது.
மாறாக வாழ்க்கைக்கு உபயோகமானவற்றை அறிந்திருக்கிறோமே என்ற மனநிறைவு, வாழ்க்கைக்கு பின்னால் பயன்படக்கூடிய திறன்களைக் கற்று இருக்கிறோமே என்ற மகிழ்ச்சி, எப்போதும் சுறுசுறுப்பாக இருக்கிறோம் என்ற திருப்தி முதலியவை ஏற்படும். தேனீயைப் போல உழைக்கணும், எறும்பைப் போல சுறுசுறுப்பாயிருக்கணும். ம்ம்ம்… நம்ம முருகன் எப்பதான் இதை உணரப் போறானோ தெரியலையே’ என்றார்.
அப்பாவும், தாத்தாவும் பேசிக் கொண்டிருந்ததை தூங்குவதைப் போல் பாவனை செய்து படுக்கையிலேயே படுத்து, கேட்டுக் கொண்டிருந்த முருகன் துள்ளி எழுந்து-
“தாத்தா, அப்பா என்னை மன்னிச்சிடுங்க. இனி நான் தூங்கி, டி.வி.யைப் பார்த்து சும்மா பொழுதைக் கழிக்க மாட்டேன். என் நண்பன் செந்திலைப் போல் நேரத்தை அர்த்தமுள்ளதாகக் கழிப்பேன். இன்றே நான் நம் வீட்டின் அருகிலுள்ள நூலகத்தில் உறுப்பினராகி ஓய்வு நேரங்களில் நல்ல புத்தகங்களைப் படிப்பேன்.
வேறு திறன்களை வளர்த்துக் கொள்ள அருகிலுள்ள ஓவியப் பயிற்சிப் பள்ளிக்குச் சென்று என் ஓவியத் திறமையை வளர்த்துக் கொள்வேன்’ என்றான்.
இதைக் கேட்ட முருகனின் தாத்தா மிகவும் சந்தோஷத்துடன் “காலம் உன் கையில் இருந்தால் வெற்றிப் படிக்கட்டுகள் உன் காலடியில்’ என்று கூறி, அவனுக்கு ஒரு வாட்சைப் பரிசாக அளித்தார்.
“முருகா, விடுமுறை என்பது ஒரு வாய்ப்பு. கிடைக்கும் நேரம் பொன் துகள்கள் என்றால், விடுமுறை என்பது தங்கக் கட்டிகள். காலம் பொன் போன்றது. பொன்னையும் வாங்கிடலாம். ஆனால், கழிந்து போன காலத்தை வாங்க முடியாது. எனவே,காலம் உயிர் போன்றது. ஏன்னா, போன உயிர் திரும்பி வராது இல்லையா. நமக்கு நிறைய நேரம் இருக்கு. நாம்தான் அதை சரியா எடுத்து பயன்படுத்தனும்.
இளமையில் குனிந்து படித்தால், முதுமையில் தலை நிமிர்ந்து நிற்கலாம்’ என்றார் தாத்தா.
முருகன் இப்போதெல்லாம் லேட்டாக எழுந்திருப்பதே இல்லை. சீக்கிரமாக எழுந்திருப்பது, சுறுசுறுப்பாக இருப்பது, அம்மாவுக்கும், அப்பாவுக்கும் துணையாக ஏதாவது வேலைகளைச் செய்து கொண்டிருப்பது போன்ற செயல்களை அவன் தொடர்ந்து செய்ததால், அது அவனுக்கு பழக்கமாகி விட்டது.
இப்போது முருகன் அவன் பள்ளியில் எல்லாத் துறைகளிலும் முதல் மாணவனாக ஜொலிக்கிறான். அவனது பழக்கத்தையும், பல திறன்களையும் வளர்த்துக் கொண்டதைப் பார்த்து அவன் அம்மா பிரமித்துப் போனார்.
“எல்லாம் என்னால்தான்’ என்று சிரித்தபடியே சொன்னார் தாத்தா.
“இல்லை… இல்லை என்னால்தான்’ என்றார் முருகனின் அப்பா.
“இல்லை… எல்லாம் என்னுடைய விடாமுயற்சியால்தான்’ என்று சிரித்தபடி டென்னிஸ் மட்டையை சுழற்றியபடியே சென்ற முருகனை, தன் தடியால் செல்லமாகத் தட்ட பின்னாடியே ஓடினார் இளைமைத் துள்ளலுடன் அவனுடைய தாத்தா.
To Get Daily Story and prayer requests in What's App Contact +917904957814
*என் அன்பு வாசகர்களே,*
"காலம் பொன் போன்றது, கடைமை கண் போன்றது" என்ற பழமொழிக்கேற்ப காலத்தை சமயோசிதமாக பயன்படுத்தினால் அதற்கேற்ற பிரதிபலன் கிடைக்கும் என்பதே இக்கதையின் கருத்து.
வேதத்தில் இஸ்ரவேல் ஜனங்கள் எகிப்தில் அடிமைகளாய் இருந்த காலகட்டத்தில் மோசே மூலம் தேவன் அவர்களை விடுவித்தார். அந்த காலகட்டத்தில் பார்வோன் ஒவ்வொரு முறை இஸ்ரவேலரை அனுப்ப மனதில்லாமல் தன் இருதயத்தை கடினப்படுத்தி இஸ்ரவேலரின் நேரத்தை வீணடித்து கொண்டிருந்தான். அவன் ஒவ்வொரு முறை காலம் தாழ்த்த ஒவ்வொரு அடியாய் அடி மேல் அடி எகிப்தியரை ஆக்கிரமித்தது. இறுதியில் நேரத்தை வீணடித்த பார்வோன் மட்டுமல்லாமல் எகிப்தியர் அனைவரும் ஒன்றாக மாண்டு போனார்கள்.
ஒவ்வொரு முறையும் நாம் நேரத்தை வீணடிக்க வீணடிக்க நம் ஆசீர்வாதங்கள் குறைந்து கொண்டே போகும். அதுமட்டுமல்லாது தேவனை அறியாதவர்கள், பின்மாற்றத்திலிருக்கிறவர்கள், தேவனிடத்தில் இன்னும் கிட்டி சேரவேண்டும் என்று வாஞ்சிக்கிறவர்கள் என எல்லாருக்கும் இது தான் சரியான தருணம். ஒரு பாடல் இவ்வாறு எழுதப்பட்டுள்ளது "வருவாய் தருனமிதுவே அழைக்கிறாரே வல்ல ஆண்டவர் இயேசுவண்டை" என்று.
பொல்லாத நாட்களில் வாழ்ந்து கொண்டிருக்கிறோம் நமது நேரத்தை நாம் பிரயோஜப்படுத்தி கொள்வோம் தேவ கிருபை உங்கள் ஒவ்வொருவரையும் ஆட்கொள்வதாக.
*16 நாட்கள் பொல்லாதவைகளானதால் காலத்தைப் பிரயோஐனப்படுத்திக்கொள்ளுங்கள்.*